Новинар / ученик: Симона Ташкова
Фотографии: Танче Туртуров
Долгогодишниот наставник по Историја и Географија, Костадин Ташков, кој беше наставник во ООУ„Ристо Шуклев“ од Негорци 40 години за Медиумскиот клуб „Шукле“ раскажа за историјатот и настанокот на нашето родно место Негорци.
Нешто слушнал од постраите генерации, а нешто и прочитал во книгата на професорот Мурџев Слободан од Негорци за името на селото. Една легенда што е најмногу раширена за името и првобитната местоположба на селото Негорци вели дека првобитното име на Негорци било Гурбеш, а се наоѓало северно од денешното село, во месноста „Црквиште“. Ова место било населба. Според сеќавањата на Атанас Баламов, првите жители на Негорци живееле во Гурбеш каде во старо време имало само неколку куќи. Легендата вели дека еден ден на селанецот Негаре му избегале свињите во местото каде што денес се наоѓа селото. Ги нашол, но забележал дека на ова место има вода и дека ова место може да биде добро место за живеење. Затоа се преселил тука и започнал нов живот.
Според зборовите на Томе Делев, исто така негорчанец, се тврди дека селото порано се викало Гурбеш и дека луѓето во старо време се населиле каде што е сега селото. Според него, причина за преселбата биле мравките што постоеле во Гурбеш. Исто така тој тврди дека името Гурбеш е турски израз и се однесува на името „Црквиште“. Дека тука навистина постоела населба говори и фактот дека кај месноста „Бајал“ бил саирот, односно центарот, плоштадот, а над него имало манастир од чија градба и ден денес има остатоци. Водата што ја има денешното село била главна причина што ги привлекла гурбешани во Негорци.
За селото Негорци постојат и други легенди што се поврзани со црковно-школските борби на нашиот народ против Грчката патријаршија. Давајќи отпор на грцизирањето со зборот „негрци“ настанало името на селото, Негорци. Населението во Негорци било мешано, христијанско и муслиманско.
Негорци со својата добра положба, водата и плодното земјиште бил привлечен за повеќе луѓе од други места и затоа уште одамна се доселувале цели фамилии кои останале да живеат во ова убаво село.
Овој текст е подготвен со финансиска поддршка од Европската Унија. Содржината на текстот е единствена одговорност на ЗГ „Од станица до граница“ од Гевгелија и не мора да ги одразува ставовите на Европската Унија.
Регионалната програма „Нашите медиуми: Акција на граѓанското општество за поттикнување на медиумска писменост и активизам, спротивставување на поларизацијата и промовирање на дијалог“ се спроведува од страна на партнерските организации: СЕЕНПМ, Медиацентар од Сараево, Албанскиот медиумски институт, Црногорскиот медиумски институт, Советот за етика во медиумите на Косово, Македонскиот институт за медиуми, Новосадската школа за новинарство, Мировниот институт од Љубљана и Бианет (Турција), со финансиска поддршка од Европската Унија.
