Црквата во село Негорци го краси центарот на селото. Има убава местоположба, убаво уреден двор со маслинови насади, во дворот брест кој е едно од најстарите дрвја, прекрасни домаќини и помагатели кои секогаш се спремни да помогнат на црквата и на жителите од селото. Поразговаравме со Никола Мурџев, домаќин на црквата „ Свети Атанасије“
Како се викала црквата во најраниот период од нејзиното градење?
Во прво време кога е направена црквата во с.Негорци, го имала името „Св.Недела“. Ова се преданија, затоа што никаде нема пишан документ, а инаку таа е подигната во 1830 година.
Како го добилка името Св.Атанасије?
Во 1860 година, 30 години по нејзината изградба, Турците ја запалиле црквата, но изгорела делумно бидејќи месното население од с.Негорци го изгаснало пожарот. Истиот ден од Негорци, Турците се упатиле кон с.Кованци за да го запалат манастирот „Св.Атанасије“ кој бил женски манастир. Но,по некоја случајност, за ова дознало дел од населението од Негорци, па поитале пред Турците за да ги известат монахињите и да ја спасат иконата „Св.Атанасије“. Турците до темел го изгореле манастирот на „Св.Атанасије“ во с.Кованци, но иконата била спасена и донесена е во с.Негорци. При ова палење на манастирот во с.Кованци и нападот над монахињите учествувале и дел од месното население на с.Кованци. Монахињите го проколнале селото. Во 1860година кога е обновувана деелумно изгорената црква во село Негорци, истата е преименувана во „Св.Атанасије“.
Каде стои денес иконата на Св.Атанасије?
Денес иконата на Св.Атанасије стои на иконоплоконикот, зазема централно место, тоа е иконата која според преданијата е донесена од женскиот манастир во с.Кованци.
Во дворот на црквата расте и се извишува еден брест кој привлекува исто така големо внимание на патници добронамерници. Што знаете за него?
Брестот е навистина мошне интересно и впечатливо дрво, кое нема кој не го загледува. Тој привлекува доста внимание, доаѓаат луѓе кои прашуваат за староста на дрвото. Тоа дрво е ставено под заштита на државата како културно историска знаменитост. Старо е околу шест века.
Богослужбите во црквата ги води свештено лице. Знаете ли кој бил најстар поп во црквата?
Најстар поп во црквата бил попот Мергуљ кој имал потекло од денешна Украина.
Во дворот на црквата има и административна зграда која е во изградба. Што имало во старо време на местото на административната зграда?
На местото на административната зграда со голема крштелна имаше помал објект, односно куќа, која била и првото училиште во с.Негорци.
Кога се чествува празникот на Св.Атанасије?
Во минатото се славел зимскиот Св.Атанасије на 31 јануари. Но, поради временските услови кои биле лоши селаните одлучиле да го празнуваат летниот Св.Атанасије, на 15 мај. Тој ден воедно е и селски панаѓур кога во селото доаѓаат гости и секој си празнува куќна слава.
Кој ја одржува црквата и црковниот двор?
Црквата и црковниот двор ги одржуваат домаќинот Никола Мурџев и отецот Марјан Радински како и други луѓе кои помагаат при возобновување на храмот и организирање на некои празници и слави како што е организирање на ручек за сите присутни на денот на св. Илија и др.
Дали во последно време има некакви промени во изгледот на храмот Св.Атанасије?
Во соработка со нашите селани ја возобновивме нашата црква: поставени се клима уреди, осветлена е целата црква…Се надеваме дека со добра мисла во најбрзо време ќе имаме уште неколку новитети. Тоа нека остане тајна. Позитивните промени се секогаш добри за сите.
И за крај, како е точното име на црковниот храм, Св.Атанасиј или Св.Атанасије?
Точното име на црковниот храм е „Св .Атанасије“.
