Повеќе од триесет години работам на и со културни настани. Организатор, учесник, креатор, па дури и сум монтирал сцени, поставувал озвучувања итн, итн… Секогаш сум се прашувал: „до кога вака? До кога ќе импровизираме, ќе измислуваме платна за кино и сценографија од обичен текстилен материјал, до кога ќе го поставувам проекторот со раце и голо око? До кога?
За овие теми никогаш не сум сакал да зборувам оти сум бил и премногу активен , но и премногу преморен од сè.
Во срцето на секој модерен град во летниот период мора да постои место каде луѓето ќе се собираат, каде уметноста ќе живее и каде идеите ќе се раѓаат под ведро небо. Гевгелија – со својата богата културна традиција и талентирани луѓе – одамна заслужува вакво место: отворена сцена со амфитеатар, достапна за сите.
Злонамерниците ќе кажат дека тоа бргу ќе се уништи! Не! Со контрола и исполнување на работни обврски, со добро поставен видео надѕор ништо не е неостварливо.
Замислете парк со полукружна сцена, професионално озвучување и добро осветлување, каде навечер би се одржувале концерти, театарски претстави, проекции на филмови, поетски вечери или танцови настапи. Ова не е само архитектонски објект – тоа би било живо срце на градот, точка каде младите и возрасните, уметниците и публиката, би се сретнувале во заедничко културно доживување.
Оваа сцена би можела да биде место за:
- Музички настани – од мали акустични свирки до поголеми концерти на домашни и гостински бендови.
- Театар и перформанс – локалните драмски групи и гостувачки ансамбли би имале сцена на отворено, со природата како сценографија.
- Кино под ѕвездите – летни проекции на филмови за сите генерации.
- Фестивали и манифестации – традиционални и современи, кои би ја збогатиле туристичката понуда на градот.
- Едукативни настани – работилници, јавни трибини, училишни свечености.
Со малку визија, ова би станало обележје на Гевгелија – место кое ќе ја промовира креативноста, ќе ги обединува луѓето и ќе го чува духот на заедницата.
За некои работи не треба многу пари туку волја и заедничка љубов кон градот. Оваа година кога сме Град на културата, признал некој или не за некои настани имавме проблем каде да бидат изведени. Во секој случај Гевгелија има доволно талентирани луѓе, ентузијасти и креатори кои би го наполниле овој простор со содржина. Сега останува само прашањето – кога ќе се одлучиме да ја изградиме сцената што ја заслужуваме?
