Зошто гевгеличани пешачат или трчаат по улица? Поради тоа што тротоарите ги нема или поради тоа што се земјени? Да, да, добро прочитавте „земјени“! Пред повеќе од пет години сакав да го цементирам тротоарот пред мојата куќа, ама соседот ме спречи, ми кажа: „не се мачи, не се троши, рекоа дека ќе ги поплочуваат!“ Јас прерадосен, си реков „добро ќе почекам, кога педесет години сум чекал ќе почекам уште некој месец“. Арно ама излезе дека тротоарите исчезнуваат побрзо од ветувањата во изборна кампања. Не, не… мојот уште постои, јас мислам на оние кои постоеја ама сега се заменети со згради.
По вторпат пишувам колумна за тротоарите и со причина. Интересно, на периферијата на градот тротоарите се поплочени, убави, барем кога фотографирам сликата е топ. Е, таму, можеш да одиш со бели патики и да се вратиш дома со бели патики. Но, влези малку подлабоко во населбите влегуваш во натуралниот свет = треви, инсекти, обраснати огради – милина од натура и на моменти помислуваш како да си во документарец за преживување. Асфалтот е тука, улиците си постојат, страничници има, ама тротоарот… тротоарот е како ретка птица – сите слушнале за него, ама ретко кој го видел.
Јас сум од Сува Река, да не повторувам, веќе знаете. Мотиката ми се скрши, ама ја крпам оти аманет ми е од мајка ми, таа го чистела тротоарот со неа, го чистам и јас. Мора да признаам чистењето ми минува со малку клетви и со многу трпение. Редовно ги чистиме од треви оти многупати сме виделе змии кои најверојатно бараат плен (доаѓаат од Сува Река, некојпат се вдомуваат и во нашите дворови). И да бидам искрен од страв од нив „накотивме“ толку мачки во реонот, да ни самите не знаеме колку нè штитат од змии.
И да, поминаа многу локални избори, се ветуваше „ќе направиме град по мерка на граѓаните“. И да, направија – ама изгледа мерката била „мерка на чизми до колена“, а тоа за чизмите и поплавените гаражи следниот пат.
Можеби ќе дојде време кога Гевгелија ќе се свести и ќе сфати дека не е важен само влезот или патот до Негорци, можеби и ние сме заслужиле да не ослободат од чистење на тротоарите, не заради друго, туку заради тоа што си ги плаќаме даноците и комуналните такси. И сега ми се отвора друга тема: кога последен пат поминал комунален работник да ни ја искоси тревата на тротоарот?
Е, дотогаш пешачете по земја, тоа е здраво, бесплатно добивате и адреналин, бидејќи никогаш не знаете дали следниот чекор ќе биде на трева, на земја или на нешто што шушка.
