Новинари: Розета Миовска и Ангела Ручкоманова
Фото: Танче Туртуров
Ментор: Жаклина Линкова
Огнената стихија над Негорци во летниот период минатата година зафати голема површина шумски појас. Пожарот претставуваше закана за првите куќи во селото и предизвика голема вознемиреност кај месното население. Денес, наместо зелена глетка над селото, гледаме голини и црни остатоци од опожарена шума. Многу години ќе поминат шумата повторно да се обнови и да го облече своето зелено руво. Ние, учениците и вработените во ООУ„Ристо Шуклев“, Негорци, секогаш сме подготвени да учествуваме во организирани акции за пошумување и обновување на зелениот појас што значи живот за сите нас. Во месец ноември минатата година учествувавме во една таква акција, а денес сме повторно на истото место и во поголем број, ученици од прво до деветто одделение, одговорни наставници и служба од училиштето, деца и одговорни лица од Дневниот центар, Гевгелија.
Поразговаравме со Марина Томова, претседател на здружението Changemakers4all, организатор на акцијата за пошумување заедно со Македонски шуми-Гевгелија и Ристо Ѓоргиев како помагател.
Како се чувствувате кога гледате толку многу деца подготвени за акција?
Многу сум среќна, навистина ми причинува задоволство кога гледам дека вашето училиште, вие децата и вработените со задоволство го прифативте повикот да се приклучите кон акцијата за пошумување на опожарен терен, место кое беше опожарено минатата година и кое опфаќа некаде околу 2000 хектари нискостеблеста шума.
Колку дрвца е планирано да се посади денес?
Нашето здружение обезбеди 3000 садници, Македонски шуми-Гевгелија исто така, а имаме и донација од „Хортикултура“ Радовиш, значи сигурно вкупно имаме околу 5000 садници.
Какви видови дрвца се садат?
Денес ќе садиме чемпрес, црн бор, јасен и даб.
Дали имате сознанија колку од посадените садници во месец ноември, од акцијата на која учествувавме, се зафатија?
Би биле среќни кога 80% од садниците би успеале, но имавме сушна зима и голем број од садниците можеби нема да успеат. Меѓутоа сега се очекува дожд, па да се надеваме дека ќе имаме поголем број успешни садници. Климатските услови се многу важни за успех на акцијата.
На кој начин ги обезбедивте садниците?
Дел од садниците се обезбедени од програмата за невладини организации на општина Гевгелија, а дел се спонзорство, цветни дрвја од општина Радовиш.
Дали се планира слична акција и во наредниот период?
Не, бидејќи дрвја се садат од 15 ноември до 15 март заради временските услови затоа што за да се зафатат дрвцата потребна е влага во почвата.
Какви активности планира вашето здружение во следниов период?
Според програмата на нашето здружение планирани се еколошки акции, хуманитарни активности, затоа што тоа е всушност нашата основна дејност, да внесуваме позитивни промени во општеството.
На следните еколошки акции би сакале и ние да учествуваме ако постои можност?
Да секако, многу ми е мило што сакате да учествувате во еколошки акции затоа што со тоа придонесуваме за почиста животна околина, поквалитетен живот, она што на сите нас ни е потребно за подобро живеење. Јас 16 години живеев во Холандија и се вратив со мислата да иницирам активности за промена кои ќе значат поквалитетно живеење на луѓето. Правевме истражување во врска со различни заболувања на овој простор и дојдовме до заклучок дека негрижата за животната средина, неправилно депонирање на отпад и други негативни појави влијаат негативно на здравјето кај луѓето. Право и обврска на невладиниот сектор е да се зборува јавно за негативните работи со цел да се поттикне развивање на јавната, еколошката свест се со цел да обезбедиме поквалитетен живот за сите.
И како порака за крај би упатила јавна благодарност до сите кои се вклучуваат во вакви и слични акции зашто само заедно можеме да направиме големи промени во општеството кои ќе имаат позитивно влијание кај сите!
