Автор: Ирена Никова
Ментор: Жаклина Линкова
„Луѓето, нивната посветеност, страст, желба да се натпреваруваат и го сфаќаат спортот како дружба и забава, се мојата најолема мотивација“- вели Кристијан Бојмалиев, основач на спортски пинг-понг настан ,, Negorci Open” од Негорци
Чија беше идеата да се реализира овој настан?
Идеата да се реализира овој настан беше лично моја. Со години сонував за вакво нешто.
Кога започнавте со реализација на идеата?
Ова е втор ваков настан, но првиот не беше толку маркетиншки покриен. Идеата за креирање на овој настан настана во моментот кога сето мое маркетинг и спортско искуство сакав да го преточам во нешто убаво. Кога спомнав Маркетинг, тоа е департманот на кој дипломирав на Економски факултет при УКИМ и моето знаење го искористив за промоција на настанот.
Какви беа условите за формирање на еден ваков настан?
Се започна буквално од нула.Благодарение на господинот Ангел Петков кој својата пинг понг маса ја постави во Младинскиот дом и овозможи да можеме таму да тренираме, дојде до сето ова што денес го гледате низ медиуми и социјални мрежи.Немавме ништо, но сите заедно од с.Негорци и со помошта на играчи од други населени места дојдовме до посакувано ниво.
Кој беше иницијатор?
Иницијатор за овој настан бев лично јас, се разбира со поддршка од сите учесници. Без нив ова нема да беше возможно
Кои ресурси ви беа потребни за да започнете со активности?
Се започна со една пинг понг маса и неколку топчиња. Рекети си купува секој индивидуално.
Дали имате поддршка од општина Гевгелија?
Самото тоа што играме во Младинскиот дом го сметаме за огромна поддршка од општина Гевгелија. Во постапка сме за решавање уште на грејното прашање , но искрено се надеваме дека ќе се реши и тоа прашање.
Какви активности имате во текот на годината?
По завршување на овој настан , продолжуваме со рекреативни тренинзи а во план ни е и да одржиме меморијален хуманитарен турнир за многу важна личност од с.Негорци која за жал не е помеѓу нас.
Колку ентузијасти имавте на почетокот , а колку сега?
Во 2017 се броевме на прсти, бевме само шест спортисти меѓу кои јас бев најмлад, но еве не сега, вкупно триесет играчи, каде најмалиот е 14 години а највозрасниот 61.
Какви се реквизити ви се потребни за реализација на вашите активности?
Сите учесници кои сме дел од оваа група со самофинансирање обезбедивме шест рингови од Германската марка Donic за да не ни бега топчето при утакмици. Кога сме кај лични реквизити, секој по своја желба.
На какви потешкотии наидовте, со што се соочувавте во изминатиот период? Имаме само еден проблем а тоа е грејното прашање во нашиот Младински дом. Покрената е иницијатива до надлежните и искрено се надевам дека тоа прашање многу бргу ќе се реши.
Што ви претставува најголема мотивација во изминатиот период?
Луѓето, нивната посветеност, страст, желба да се натпреваруваат и да го сфатат спортот како дружба и забава. Сите функционираме како една целина, нераскинлива клетка. Секако голема благодарност и до директорката на ООУ „Ристо Шуклев“ која ни овозможи да имаме уште една пинг понг маса и до сите помагатели, спонзори и се разбира Генералниот спонзор, Ресторан „Романса“, Прдејци, господинот Борче Лазаров. Оваа прилика ја користам безрезервно да му се заблагодарам.
На какви турнири сте учествувале или сте биле домаќини?
Како што веќе напоменав, ова е втор ваков настан на кој Негорци е домаќин, додека лично јас сум учествувал на повеќе приватни турнири низ Република Македонија, Државно првенство, Втора Лига,Телеком Мастерс и на два турнира надвор од Македонија.
Какви награди и признанија сте добиле досега и која ви е посебно значајна? Ќе.започнам со моите индивидуални награди. Имам освоено прво место во Гевгелија(сала „26 април“ ), прво место на турнир Гевдион, Второ место во Будва(Црна Гора), трето место во Златни Песоци(Бугарија), трето место во Битола,трето место на Јосифовско лето 2023, петто место на Државно првенство и петто место во Кратово. Кога сме кај тимските награди, сите награди ми се освоени со мојот верен соиграч Ангел Петков. Имаме прво место во Гевгелија(сала „26 април“) , трето место на Гевдион и прво место на Negorci open 2024. Се надеваме на одбрана на титулата во новата 2025 година Кога сме кај тоа која ми е најзначајна победа, дефинитивно тоа е победата во Гевгелија во септември 2023. Имајќи во предвид дека два ипол месеци пред оваа победа бев во гипс со пукната рака и нога, но со многу труд и желба за успех се вратив посилен и во тешка спортска конкуренција дојдов до прво место, така што оваа победа ќе ја издвојам како најзначајна.
Овој текст е подготвен со финансиска поддршка од Европската Унија. Содржината на текстот е единствена одговорност на ЗГ „Од станица до граница“ од Гевгелија и не мора да ги одразува ставовите на Европската Унија.
Регионалната програма „Нашите медиуми: Акција на граѓанското општество за поттикнување на медиумска писменост и активизам, спротивставување на поларизацијата и промовирање на дијалог“ се спроведува од страна на партнерските организации: СЕЕНПМ, Медиацентар од Сараево, Албанскиот медиумски институт, Црногорскиот медиумски институт, Советот за етика во медиумите на Косово, Македонскиот институт за медиуми, Новосадската школа за новинарство, Мировниот институт од Љубљана и Бианет (Турција), со финансиска поддршка од Европската Унија.
